BAGUIO CITY – Tarigagay ti Indigenous Peoples Mandatory Representative (IPMR) ti Benguet a maipasidong iti orientation dagiti amin nga umili iti probinsia tapnu maipalawag a naimbag kadagitoy dagiti linteg seknan iti Indigenous Peoples ken Indigenous Cultural Communities.
Iti panakiyuman ti Bombo Radyo kenni Benguet IPMR Sario Copas, kinunana masapul a maipakaawat ti Indigenous People’s Rights Act wenno IPRA Law.
Kinunana a babaen iti daytoy ket maawatan dagiti umili dagiti karbenganda kas nainsigudan nga umili ken kameng ti nainsigudan nga ili malaksid pay a maamuanda no kas-ano a salwadanda dagiti nabatbati a natural resources kas kadagtii danum, kayo ken mineral.
Dinakamatna nga addan dagiti IPs a nagkamang iti opisinana seknan iti parikut dagitoy iti nainsigudan a bambanag isut gapuna a makitkitana ti pagkasapulan para iti panakapaayab dagiti umili tapnu ma-orient dagitoy.
Kabayatanna, umap-apela ni IPMR Copas kadagiti umili iti probinsia ti Benguet tapnu ipaayda ti suportada kadagiti nadutukan nga IPMR dagitoy manipud iti barangay agingga iti munisipyo tapnu makagaraw dagitoy ken adda ti maaramidda a pagsayaatan para iti amin nga umili.
