BAGUIO CITY – Agarup P5.6-M ti pakabuklan a gatad dagiti nadadael a highland vegetables gapu iti napasaran a hail storm wenno panagtudo ti yelo kadagiti sumagmamano a munisipyo iti probinsia ti Benguet.
Iti panakiyuman ti Bombo Radyo, kinuna ni Agot Balanoy, spokesperson ti liga dagiti asosasyon iti La Trinidad Vegetable Trading Post a ti nasao a gatad ket maibasar iti damage assessment nga insayangkat ti Department of Agriculture – Cordillera.
Kinunana a 10 agingga 15 a porsiento laeng ti naireport a danyos manipud iti kadawyan a volume wenno suplay dagiti nateng iti probinsia.
Innayonna a maibasar iti datus ti ahensia ket nailista ti munisipyo ti Atok ti kadakkelan a gatad dagiti nadadael a natnateng a dumanon iti P3.9-M, sumaruno ti Buguias a nakailista iti nasurok P806K, sadiay Madaymen, Kibungan a nasurok P460K ken sadiay Bakun a nasurok iti P407K.
Linawlawaganna met nga awan wenno saan pay a marikna ita a panawen ti epekto ti napasamak a hail storm ngem ketdi, posible a marikna kadagiti masungad a bulan.
Impalawagna a daytoy ket gaputa kaaduan kadagiti nadadael a nateng ket dagiti babassit a mula ken dagiti saan pay a maapit a nateng.
Dinakamat pay ni Balanoy a malaksid kadagiti nadakamat a lugar ket sumagmamano kadagiti nateng sadiay Cada, Mankayan, Benguet ken paset ti Bauko, Mt. Province ti naapektaran iti hail storm ngem awan pay ti naisayangkat a damage assessment kadagitoy.
