BAGUIO CITY – Guyguyuguyen ti dadaulo ti Baguio City Police Office (BCPO) – Station 7 dagiti napukawan ti cellphone iti kadakkelan a mall ditoy siudad wenno iti Central Business District idi aldaw ti Miyerkoles tapnu agturongda iti opisina dagitoy.
Sigun kenni PCI Marlo Evasco, adda ti nakemmegda a lima a miyembro ti ‘Sudden Death Gang’ nga agrikrikus ditoy siudad nga agtaktakaw ti cellphone.
Kinunana a dua a cellphone ti narekober manipud kadagitoy ngem agingga ita ket awan pay ti nangala iti BCPO-Station 7 bayat a maysa pay a cellphone ti intaray ti maysa a kadua dagiti suspek.
Innayonna a nabayagen nga ar-aramiden ti nasao a grupo ti panagtakaw kadagiti cellphone iti sentro ti syudad.
Nupay kasta, inaklonna a saan a makasuan ti dadduma kadagiti miembro ti grupo gaputa menor de edad paylaeng dagitoy.
Iti baet daytoy, ibalbalakadna latta ti panangipila dagiti biktima iti kaso kontra iti nasao a gang tapnu makasuan dagiti adda iti legal nga edad.
