BAGUIO CITY – Iyap-apela manen ti COMELEC kadagiti kandidato iti barangay ken sangguniang kabataan (SK) elections ti panangsurot dagitoy kadagiti amin a pagalagadan, partikular dagiti mandatory provisions ti RA 9006 wenno ti Fair Election Act.
Iti panakiyuman ti Bombo Radyo kenni Atty. John Paul Martin, dadaulo ti COMELEC-Baguio, kinunana a nasken a saan nga urayen dagiti kandidato ti panangbukel ti komisyon iti baklas team a mangikkat kadagiti iligal a campaign posters.
Inyunay-unayna nga amin a pagalagadan iti umno a campaign material ket nakalanad iti linteg a naipatungpal kadagiti napalpalabas nga eleksion.
Dinakamatna nga ipaayanda iti gundaway dagiti kandidato a mangisimpa iti posters dagitoy ngem no saan nga agtungpal dagitoy iti linteg ket nakasagana ti COMELEC a mangbaklas kadagitoy.
Innayonna met a kalpasanna ket maimbentaryo dagiti mabaklas nga illegal campaign posters ken isumitirda iti Law Department ti komisyon ti inventory ken nagan dagiti violators para iti panakaipila ti kaskenan a kaso.
Impetteng ni Atty. Martin a no daytoy ti matungpal ket saanna a kayat nga adda dagiti kandidato a makasuan gapu kadagiti panaglabsingda iti linteg nangruna ta ti masungad nga eleksion ket ay-ayam iti barangay.
Nupay kasta, tinakderanna nga iti kanito nga adu unay ti maawatda a reklamo kontra kadagiti iligal a campaign posters iti siudad ket obligasyon ti COMELEC a mangbaklas kadagitoy.
Kabayatanna, ipalpalagip ni Atty. Martin nga amin a donasyon a naaramat iti panagkampanya ti maysa a kandidato ket mainayon iti kompyutasyon ti Statements of Contributions and Expenditures (SOCE) daytoy.
Kinunana a daytoy ti rason no apay nga ikalkalikagum ti linteg a nasken a mailanad iti campaign materials ti maysa a kandidato ti kompleto a nagan ken address ti nagbayad para iti panakaimprenta dagitoy.
Inlawlawagna nga amin a kontribusyon ken donasyon a naawat ti maysa a kandidato ken ti mismo a gastos daytoy wenno personal expenditures ket masapul a mailanad iti isumitirna a SOCE kalpasan ti election period.
Innayonna nga amin a donasyon a maawat ti kandidato ket maibilang a gastosna ken amin a nabusbos para kenkuana ket nasken a maideklara iti SOCE ken saan a lumabes ti total expenditures iti itudtuding ti linteg a P5 tunggal rehistrado a botante iti barangay iti entero a panawen ti panagkampanya.
Sigun pay kenkuana, narigat a mapaneknekan no asino dagiti naggastos no ti naikabil iti campaign materials ket ‘donated by friends’ laeng ken gaputa dagiti kandidato ti nagnumar, dagitoy ti mapatawan ti kaskenan a pannusa.
Maibasar iti website ti COMELEC, ti maudi a panagsumitir iti SOCE ket inton June 13.
