BAGUIO CITY – Inaklon ti COMELEC nga awan ti hurisdiksionda kadagiti kandidato nga agkamkampanya babaen iti social media kas iti Facebook ken Twitter.
Sigun kenni City Election Officer Atty. John Paul Martin, ti laeng nailanad iti COMELEC Resolution No. 10294 ket ti hurisdiksion ti komisyon kadagiti online forms dagiti campaign paraphernalia.
Inlawlawagna a dagitoy dagiti pop-ups ken banners a makitkita a rumuar lattan iti screen ti gadget no naka-online wenno nakakonektar ti gadget iti internet.
Innayonna a saan a mabigbig ti hurisdiksion ti komisyon iti social media platforms gapu iti territorial law.
Nupay kasta, kinunana a mabalin latta nga aramaten dagiti kandidato ti social media nga agkampanya ngem nasken met a sangwen dagitoy ti epekto ti panag-aramatda iti daytoy.
Sigun kenkuana, iti baet a libre ti panagkampanya iti social media, mabalin met a makaawat ti maseknan a kandidato iti kritisismo wenno panag-bash manipud kadagiti netizens iti amin a paset ti lubong, saan laeng a kadagiti kabarangayan daytoy.
