BAGUIO CITY – Nakaawat ti COMELEC-Baguio iti uppat nga election offense complaint kalpasan ti naangay a Barangay ken SK Elections.
Iti panakiyuman ti Bombo Radyo kenni Atty. John Paul Martin, City Election Officer, kinunana a dagitoy a reklamo ket nagtaud iti Asin Road Barangay, Andres Bonifacio Barangay, Sto. Tomas Proper Barangay ken iti Palma-Urbano Barangay.
Sigun kenkuana, linaon dagiti reklamo dagiti alegasyon iti panaglabsing iti Fair Election Act.
Kinunana nga amin dagitoy ket maipaila iti COMELEC – Law Department para iti umno a disposisyon.
Imbingay ni Atty. Martin a naireklamo sadiay Asin Road ti maatap a panagtalinaed dagiti incumbent barangay officils iti masakupan ti polling center sadiay ken adda pay ti naibati a sample ballot iti lamisaan iti uneg ti pagbotosan.
Naireklamo met sadiay Sto. Tomas Proper ti panang-hakot ti maysa a kandidato kadagiti apan agbotos babaen iti pribado a lugan daytoy bayat nga iti Palma-Urbano ket naireklamo ti panangiwaras ti maysa nga incumbent official iti campaign materials iti mismo nga aldaw ti eleksion iti asideg ti pagbotosan.
Innayonna nga inawatna amin a reklamo ken mabalinda pay nga umawat la ketdi kompleto dagiti dokumento ken ebidensia nga isumitir dagiti agipila iti reklamo iti opisina dagitoy.
