BAGUIO CITY – Manarimaan ti panakarepaso ti kasasaad ti panagbiag ditoy Cordillera para iti posibilidad a panakaipangato ti sweldo dagiti minimum wage earners ditoy rehion.
Impeksa daytoy ni Regional Tripartite Wages and Productivity Board (RTWPB) – Cordillera Board Secretary Augusto Aquillo kasaruno ti arungaing dagiti umili gapu iti panagngato ti presyo dagiti dadduma a gagatangen ken serbisyo nga intunda ti implementasyon ti TRAIN Law.
Sigun kenkuana, agpason inton umay a June 5 ti makatawen nga implementasyon ti panakaipangato ti minimum a sweldo ditoy rehiyon a kas itudtuding ti linteg.
Kinunana a kalpasan ti June 5 ket mabalinen a maipatungpal dagiti addang para iti posible a panakaipangato ti sweldo dagiti minimum wage earners iti rehiyon.
Innayonna a kasapulan a masurot ti proseso ti linteg iti nasao a ganwat a kas kuma iti panakaipatungpal ti public consultation iti nagbaetan dagiti employer ken dagiti empleyado tapnu mabalanse ti amin a dasig.
Maipalagip a gapu iti panakaipangato ti plete iti taxi ken ti maisaksakad a panakaipangato ti plete iti jeep ket manaynayunan met ti bilang dagiti umili a mangkidkiddaw iti panakaipangato ti suweldo ditoy rehiyon Cordillera ken saan laeng a para kadagiti minimum wage earners no di ket kadagiti amin a mammangged iti pribado a sektor.
