BAGUIO CITY – Binabalaw ti ama ti siudad ti Baguio ti Department of Tourism (DOT) – Cordillera gapu iti nabayag a panakaitantan ti Project Puraw sadiay Quirino Hill wenno iti Carabao Mountain.
Sigun kenni Mayor Mauricio Domogan, awanen iti damagna manipod iti DOT-Cordillera no maituloy pay laeng ti nasao a proyekto.
Kinunana a nabayag a naplano ti nasao a proyekto ken naipatungpal pay ti pormal panakaiyuswat daytoy ngem agingga ita ket awan met iti pondo nga impaluspos ti ahensia para iti daytoy.
Nupay kasta, impeksana a makikoordinar daytoy kenni City Congressman Marques Go para iti posibilidad ti panakaituloy ti nasao a proyekto.
Maipalagip a ti Project Puraw ket paset ti Revitalize Bloom Program ti DOT-Cordillera ken saksakupenna ti agarup 2,000 a babbalay iti Lower Quirino Hill, Middle Quirino Hill, East Quirino Hill ken West Quirino Hill.
