BAGUIO CITY – Inserbi dagiti pulis ti dua a search warrant iti dua a pagtaengan sadiay Km. 3, Asin Road, siudad ti Baguio idi agsapa kalman.
Immuna nga inserbida ti search warrant iti pagtaengan ni Santiago Masculino ken sadiay a nakumpiskar ti maysa a caliber 30 a naglaon ti maysa a magazine ken innem a bala.
Imparang ti mismo nga asawa ni Masculino ti nasao a paltog.
Simmaruno a naiserbi ti search warrant iti pagtaengan ni Christopher Binlayan ngem awan ti nakumpiskar iti items a naikabil iti search warrant.
Nupay kasta, aksidente a nakakumpiskar dagiti pulis iti maysa a caliber 30, maysa a magnum 22, dua a magazine, 36 a bala ken maysa a granada.
Naamuan nga agpada nga impaulog ni 3rd MCTC, Bokod-Kabayan Presiding Judge Adolfo Malingan dagiti nasao a search warrant.
