BAGUIO CITY – Nakabaluden ti maysa a lalaki kalpasan a binagbagsolna ti tallo nga indibidual iti terminal dagiti jeep paturong iti La Trinidad iti deppaar ti sigud a Rabbit Sinkhole sadiay Lower Magsaysay, siudad ti Baguio idi kalman.
Nabigbig daytoy a ni Jimrhyl Dimas, 26-anyos, tubo ti Mankayan, Benguet ken residente ti First Gate, Ucab, Itogon, Benguet.
Nabigbig met dagiti binagbagsolna a da Denmar Tada, 19-anyos, minero; Aries Bulsao, driver ken ti managan ti Celso.
Maibasar iti report, paawid dagiti tallo kalpasan a nagiinom dagitot iti paset ti sigud a Rabbit Sinkhole.
Imbati da Bulsao ken ti managan Celso ti biktima a ni Tada tapnu apanda agkita ti paglugananda bayat a nagbati ni Tada tapnu agisbo iti ayan ti paradaan.
Manarimaan ti panag-isbo ni Tada idi nakita daytoy ni Racel Bayong, 21-anyos, minero, tubo ti Ifugao ken residente ti First Gate, Ucab, Itogon, Benguet.
Pinukkawan ni Bayong ni Tada sakbayna nga inasitgan ken inapa ti umis-isbo a biktima.
Nakita met daytoy ti suspek a ni Dimas ken sadiay nga inasitganna ni Tada sakbay a binagbagsolna ti nagduduma a paset ti bagi ti biktima.
Naimatangan met da Bulsao ken ti managan ti Celso ti insidente isut gapuna a dagusda nga inanawa ni Dimas ngem nagresulta daytoy iti panakabagsol ti tengnged ni Celso ken iti panakabagbagsol ti nagduduma a paset ti bagi ni Bulsao.
Dagus a nagresponde dagiti pulis a nangitunda iti panakakemmeg ti suspek nga ita ket sumangsango iti multiple frustrated homicide bayat a saan a narekober ti inaramatna a kutsilyo.
Agtaltalinaed met nga unconscious ni Bulsao bayat nga under observation ni Tada.
