BAGUIO CITY – Iyap-apela ni Mayor Mauricio Domogan ti panangipatungpal ti Department of Public Works and Highways (DPWH) iti nainget a panagadal kadagiti applicable technical solutions a mabalin a maimplementar kadagiti kritikal wenno napeggad a paset ti Marcos Highway.
Sigun kenkuana, babaen iti daytoy ket maprebentaran ti panakapasamak dagiti aksidente a mangituntunda iti peggad iti biag ken sanikua ken iti killaat a panagsardeng dagiti lugan nga agresresulta iti itataud ti nakaro a trapiko nga agpapaut iti sumagmamano nga oras.
Nupay saan a sakop ti Baguio ti kaaduan a paset ti Marcos Highway, impetteng ti mayor a maseknan dagiti opisyales ti siudad iti nakaro ken negatibo nga epekto ti nakaro a trapiko kadagiti lugan a sumrek ken rumuar iti siudad.
Inyunay-unayna a kasapulan ti umno nga engineering interventions nga ipatungpal dagiti maseknan nga ahensia ti gobyerno tapnu marisut ti nasao a pakaseknan.
Imbilinna pay ti nainget a panakikoordinar ti Baguio City Police Office – Traffic Enforcement Unit iti Tuba Municipal Police Station para iti dagus a panang-implementarda iti kaskenan a traffic mitigation programs no mapaspasaran ti nakaro a trapiko iti Marcos Highway tapnu maipaayan dagiti motorist iti umno a direksion no kasano a liklikanda ti nasao a trapiko.
