Inkeddeng ti Baguio City Council a mangipatungpalda pay iti panagkonsiderar iti maysa a naisingasing nga ordinansa a mangipaay iti agtultuloy a programa ken serbisio ti gobierno kadagiti naggapu wenno naggraduate a benepisiario ti Pantawid Pamilyang Pilipino Program (4Ps).
Daytoy ket kalpasan a kinuwestionaran dagiti konsehal no kasapulan pay ti maysa a lokal nga ordinansa tapno makastrek dagiti kwalipikado a naggraduate iti 4Ps kadagiti programa ken tulong ti gobierno.
Sigun kenni City Councilor Yuri Weygan, masapul a maibalanse ti tulong kadagiti naggraduate iti 4Ps ken kadagiti pamilia a paset pay laeng ti programa, kasta met kadagiti dadduma a residente a kasapulan ti tulong ti gobierno.
Kinuwestyonaran ni Councilor Weygan no nasaysayaat a maiturong dagiti limitado a pondo iti panangpapigsa iti suporta kadagiti agtultuloy pay a benepisiario ti 4Ps.
Kinuna met ni City Councilor Leandro Yangot Jr., a panggep daytoy a maipatungpal ti prinsipio ti social justice babaen iti panangipalubos kadagiti naggraduate iti 4Ps a makastrek pay kadagiti programa ti gobierno kalpasan ti panagruarda iti nasao a programa.
Inlawlawag met ni City Councilor Betty Lourdes Tabanda, Committee on Social Services, Women, and Urban Poor, a saan a panggep ti singasing a mangipaay iti baro wenno naisina a benepisio para kadagiti naggraduate iti 4Ps.
Imbes ketdi, mabalin a mairaman dagiti kwalipikado a naggraduate kadagiti programa ti siudad, maibasar iti kasapulan, pagalagadan ken assessment a maipakat met kadagiti dadduma a benepisiario.
Karaman kadagiti programa a nadakamat iti singasing nga ordinansa ti tulong manipud iti City Social Welfare and Development Office (CSWDO), disaster relief, social pension, serbisio ti salun-at, skills training, employment referral, livelihood assistance ken educational assistance.
Nupay kasta, naipalagip a ti panangawat kadagiti nasao a serbisio ket maibasar iti assessment dagiti social worker, pagalagadan ti kwalipikasion, kaadda ti slots ken ti magun-od a pondo.
Inlawlawagna met a saan nga automatiko ti panangawat iti tulong, gapu ta kasapulan pay a ma-assess no kasapulan pay ti pamilia ti suporta.
Sigun kenni Councilor Tabanda, agtultuloy latta a maibasar iti assessment ken kwalipikasion ti panagawat iti tulong. Inlawlawagna met a pakairamanan ti naisingasing ti panangaramid iti sustainability plan tapno maurnong dagiti pakaseknan maipanggep iti kaadu ken kabayag ti tulong para iti benepisyaryo.
Inlawlawag pay ni Tabanda a panggep laeng daytoy a mangipalubos iti agtultuloy a pannagserrek dagiti kwalipikado a naggraduate kadagiti serbisio ti siudad.
Impeksa ni Tabanda a saan a panggep ti naisingasing ti mangpaatiddog iti 4Ps, no di ket mangipalubos kadagiti naggraduate a makastrek kadagiti regular a programa ti gobierno kalpasan ti panagruarda iti programa.
Kabayatanna, inlawlawag met ti City council a mabalin latta a makaala iti regular a tulong ti gobierno dagiti kwalipikado a naggraduate iti 4Ps uray awan ti naisingasing nga ordinansa.
Gapu kadagiti pakaseknan ken saludsod a naiparang iti diskusion, impalubos ti City Council ti pannakaipatungpal ti aksion iti naisingasing ken insubli daytoy iti Committee on Social Services para iti ad-adda a panangadal, agraman ti mabalin a panagbalbaliw iti pannakaisuratna wenno panangisukat iti porma daytoy kas resolusion.// via Bombo Khey Reparip
