July 11, 2018 | Wednesday
by: Bombo Radyo Baguio
[SPECIAL REPORT | This is a developing story.]
BAGUIO CITY – Naisumitiren iti DOH-Central Office ti 4 a samples dagiti kendi nga inwaras ti agasawa a koreano kadagiti ubbing saiday Natubleng, Buguias, benguet a nangitunda iti mapapati a panakasabidong dagitoy.
Sigun kenni Dr. Hilda Kimakim, Municipal Health Officer ti Buguias, dagiti samples ket ti mismo a naiwaras iti ubing, ti naala a kendi iti boarding house ti agasawa a koreano, ti display iti grocery ken ti kapada ti nasao a kendi malaksid pay iti sample ti danum iti aglawlaw ti pagadalan a paset ti protocol dagitoy no adda dagiti maatap a kaso ti food poisoning.
Kinunana a maipasidong dagiti samples iti content analysis, bacteriology ken toxicology ken dagitoy ket naisumitir iti DOST ken DOH.
Dinakamatna nga addan ti resulta ti lab test iti DOST-Benguet ngem maipasidong iti confirmatory test bayat a dagiti samples a naipatulod iti DOH-Central Office ket para iti toxicology ken naipaadal iti maysa a privado nga institusyon sadiay metro manila.
Inaklonna a bumayag ti tresulta gaputa adda pay ti confirmatotry test isut gapuna nga inyapelana met laeng ti panag-anus nga aguray dagiti nagannak ken maseknan nga umili.
Stress Debriefing
Nairekomendar ti panakaipasidong dagiti ubbing a nasabidongan ken dagiti nagannak dagitoy, uray pay dagiti umili ken mannursuro iti Natubleng Elementary School iti Stress Debriefing.
Sigun kenni Dr. Kimakim, daytoy ti rekomendasyon ti Provincial Health Office ken ti DOH-Cordillera.
Kinunana a babaen iti Stress Debriefing ket ammo dagiti nagannak ti ar-aramiden dagitoy nangruna no agpakaro manen dagiti ubbing ken maisaganada no anyaman ti agbalin a resulta dagiti samples a naipasidong iti lab tests.
Maipatungpal ti Stress Debriefing babaen iti DOH iti panangikoordinar ti DepEd babaen iti kiddaw para iti nasao a banag.
Imbalakadna met kadagiti nagannak ken mannursuro dagiti ubbing a no agpakaro dagitoy ket pakalmaenda pay nga umuna ti ubing sakbayda nga iturong iti klinika tapnu maipatungpal ti first aide.
Acute Gastroenteritis
Inlawlawagna pay nga acute gastroenteritis ti inkabil dagiti doktor a sagsagabaen dagiti ubbing gaputa awan pay ti resulta iti panakaadal ti kinnan dagitoy.
Child Abuse
Kabayatanna, naipilaanen ti agasawa a koreano a nangiwaras kadagiti kendi iti 19 a bilang ti child abuse gapu iti mapapati a panangdanogda kadagiti ubbing a nagkedked a mang-awat iti iwarwarasda a kendi ken panangpwersada a mangilukat iti ngiwat dagiti ubbing tapnu isubo ti kendi.
Kinuna ti imbestigador ti kaso a naipaulogen ti subpoena para iti uppat nga immuna a kaso ti child abuse wenno manhandling a naipila kontra iti agasawa bayat a kaipilpilada laeng iti kanayonan a 15 a kaso ti child abuse.
Naipaayan iti 10 nga aldaw ti agasawa a koreano tapnu agpalawag ken i-refer ti pulisya dagitoy iti abogado bayat a naawaten ti agasawa ti subpoena dagitoy idi Lunes.
Nakumpirmar met iti Bureau of Immigration a nakalista ti agasawa a da Lee Hua Woo ken Lee In Suk kas ‘missionaries’ ken dagitoy ket nagtaud iti Republic of Korea.
Indanunda pay ti pakaseknan nga awanan ti babae a ni lee in suk iti pasaporte ken kiniddawda ti panang-imbestigar ti Bureau of Immigration iti kaawan ti pasaporte ti koreana.
Kabayatanna, naamuan a dumanon amin iti 45 ti bilang dagiti biktima; 25 iti Natubleng Elementary School, pakairamanan ti maysa a mannursuro ken kindergartens bayat a ti 20 ket dagiti estudyante iti sekondarya, pakairamanan ti maysa a taga-Atok.
Idi Lunes, naitaray manen iti pagagasan ti tallo kadagiti ubbing a nabiktima iti mapapati a food poisoning.
LGU
Makikaykaysa ti municipal government iti panakalawlawag ti isyu ken iti panakarisut daytoy.
Impeksa ni Buguias Mayor Ruben Tinda-an a no adda a talaga ti kaso wenno mapaneknekan ti korte ti alegasyon iti child abuse ket nasken laeng a madusa ti agasawa.
Inyunay-unayna a kasapulan nga adda ti natibker a basaran sakbay a madusa ti agsawa a koreano
Dinakamatna nga iti baet ti kinakumikom ti opisinana ket ar-aramiden amin dagiti municipal officials ti kabaelanda tapnu makipasetda iti panakaimbestigar ti kaso ngem adda ti limitasyon dagitoy gapu iti linteg kas iti proseso a nasken a masurot.
Innayonna nga adda ti pondo ti munisipyo para iti pinansial a tulong dagiti ubbing a sag-P2,000 la ketdi maiproseso dagiti kasapulan a dokumento.
Insingasing pay ti mayor ti panakaisayangkat ti general clean-up iti nasao a pagadalan.
