BAGUIO CITY–Mangnamnama ti Traffic Enforcement Unit ti Baguio City Police Office balligi ti maipasa iti lokal a konseho ti panakabalbaliw ti nagdudumaa traffic ordinance iti siudad a mangitudtuding iti nangatngato a multa kadagiti aglabsing.
Iti panakipatang ti Bombo Radyo kenni PCI Oliver Panabang, hepe ti nasao a unit ti pulisia iti siudad, mangnamnama dagitoy a maksayan dagiti mailislista dagitoy a bilang dagiti aglablabsing iti kanito a maipangto ti multa dagiti nagduduma a violation.
Kinunana a gapu iti nababa a multa ket nalaklaka laeng nga agbaybayad dagiti addaan iti lugan nga innaldaw a matiltiliwan gapu iti kanayon a panaglabsing da iti nagduduma nga ordinansa.
Maibasar iti nasao a singasing, maipangato iti P500 ti multa kadagiti aglabsing iti illegal parking, anti-road obstruction ken non observance of traffic signs manipod iti agdama a P150 laeng.
Naisingasing met laeng ti panakaipangato ti multa kadagiti drivers a matiliwan a nakainom iti arak iti P5, 000 manipod iti agdama a P1,000.
Kinuna ni PCI Panabang a manamnama a dakkel ti agbalin nga epekto ti nagdagdagsen multa kadagiti motorista iti kanito a maaprobaran daytoy.
