BAGUIO CITY – Nakemmeg ti uppat a lallaki a pakairamanan ti dua a menor de edad gapu iti panangbugbogda iti maysa a porter iti sangwanan ti maysa a panganan sadiay La Trinidad Vegetable Trading Post idi kalman.
Nabigbig dagitoy a da Mark Hidalgo, 29-anyos, helper ken Brix Torda, 18-anyos; ken ti dua a menor de edad a 17-anyos a carrot washer ken 16-anyos a carrot washer ken dagitoy ket bin-ig a tubo ti La Union ken agab-abang sadiay La Trinidad, Benguet.
Nabigbig met ti biktimada a ni Ricky Halili, 35-anyos, naasawaan, porter, tubo ti Atok, Benguet ken residente ti Pico, La Trinidad, Benguet.
Maibasar iti report, dinanog ni Hidalgo ti biktima kalpasan nga impukkaw ti biktima ti ‘bakla’ apaman a simrek ni Hidalgo iti comfort room dagiti babbae.
Rimuar ti biktima manipud iti balay paginuman ken nagdamag no asino ti nangdanog kenkuana sakbay a kinaritna dagiti suspek iti dinnanog.
Gapu iti daytoy, dinanog ni Hidalgo ti biktima ken sadiayen a pinagtutulongan dagiti suspek ti biktima.
Nakumpiskar pay kadagiti suspek ti buneng ken landok a tubo.
Naitaray ti biktima iti pagagasan ken naamuan a nagsagrap daytoy ti dunor iti ulo a kasapulan a maipasidong iti oprerasyon.
Naibalud metten da Hidalgo ken Torda bayat a naipabiang iti DSWD dagiti dua a menor de edad.
