BAGUIO CITY – Inkalintegan ti National Task Force Mining Challenge a mangim-implementar iti Oplan Itogon ti operasyon dagitoy sadiay Itogon, Benguet.
Sigun kenni DENR-Cordillera regional director Ralph Pablo, ti panangkumpiskarda kadagiti mineral ores wenno naba ken dagiti nagduduma a kagawaan ti panagminas manipud kadagiti minero ket nakalanad iti pagalagadan iti implementasyon ti Oplan Itogon.
Inlawlawagna a dagiti kumkumpiskarenda ket maaramat nga ebidensia kontra kadagiti nakemmeg a minero.
Kinunana a maipaima wenno maisubli iti lokal a gobyero dagiti nakumkumpiskarda a naba ken kagawaan ti panagaminas.
Impettengna nga iti operasyonda ket saanda a basta lattan sumrek kadagiti naka-padlock a pagminasan ken pagproseso-an ti balitok.
Innayonna pay a saanda a kasapulan ti search warrant iti implementasyon ti Oplan Itogon a maitunos iti stoppage order iti amin nga small scale mining operations iti Cordillera.
Maibasar iti kaudian a datus ti task force, dumanon iti agarup 540 a pagminasan ti naparikpan dagitoy sadiay Itogon, Benguet.
