BAGUIO CITY – Sinuspindir ti lokal a gobyerno ti Itogon, Benguet ti klase iti lima a pagadalan sadiay kagiddan ti naisayangkat a Joint Regional Council Meeting iti nagbabaetan dagiti nagduduma nga ahensya ti gobyerno sadiay.
Sigun kenni MGB- Central Office Geologist Galvin Garlan, maibilang a critical area dagiti nakaipasdekan dagiti nasao a pagadalan gapu kadagiti rengngat ken panagbaba ti daga a mangap-apektar iti kasasaad dagiti pasdek.
Nasuspindir ti klase ti Loakan National High School, Ampucao National High School ken Ampucao Elementary School, Ucab Elementary School ken Mangganese Elementary School a naka-apektaran ti ginasgasut nga studyante.
Kabayatanna, panggep ti Department of Education (DepEd)-Cordillera a mangimuntar ti temporaryo a learning centers tapnu saan a maapektaran ti panagadal dagiti nasao nga studyante iti paset ti Bua, Tuding.
Impanamnama met ni DepEd-Cordillera Regional Director May Eclar a dagusda a mangimuntar kadagiti tent nga aramaten dagiti estudyante kas temporaryo a learning centers.
