BAGUIO CITY – Nakemmegen ti suspek a mapapati a nangpapatay iti sales clerk ti maysa a pawnshop sadiay Abanao Square, ditoy siudad ti Baguio idi napalabas nga Agosto.
Maipalagip a ti biktima ket ni Lindsay Vallejos Valdez, 23-anyos, tubo ti Urdaneta, Pangasinan ken residente ti Purok 3, Lower Pinget, Baguio City.
Sigun kenni PCI Marlo Evasco, station commander ti Baguio City Police Office – Station 7, nabigbig ti nasao a suspek babaen kadagiti naiwaras a ladawan ken CCTV footage kadagiti nagturturungan daytoy a lugar.
Kinunana a positibo met laeng a binigbig dagiti testigo ti nasao a suspek agingga a natuntunda ti pagtaengan daytoy ditoy siudad.
Impannakkelna a nakemmegda ti suspek idi kalman.
Sumangsango ti suspek iti kaso a robbery with homicide gapu iti panangpapatayna iti biktima ken kaso a robbery nga impila ti negosyante nga akinkukua iti pawnshop.
Maipalagip a dumanon iti nasurok P87,000 ti gatad ti kwarta ken 15 a gadgets ti tinakaw ti suspek.
Maibasar iti CCTV footage, agdaldalus ti biktima iti sangwanan ti pawnshop idi killaat a ginuyud daytoy ti suspek pauneg iti pawnshop kagiddan ti panangtutukna ti kutsilyo iti tengged ti biktima.
Imbilin ti suspek ti panangilukat ti biktima iti vault room ken kalpasanna ket intalina ti biktima sakbayna a tinakaw ti nasoa a gatad ngem sakbay a pimmanaw ti suspek ket iniwana ti tengnged ti biktima.
