BAGUIO CITY – Naiyawiden sadiay Pinukpok, Kalinga ti bangkay daydi Cpl. Adonis Valera a pimmusay kabayatan ti engkwentro ti tropa ti gobyerno kontra iti New People’s Army (NPA) sadiay Echague, Isabela idi napalabas a Biyernes.
Iti panakiyuman ti Bombo Radyo kenni Maj. Noriel Tayaban, panakangiwat ti 5th Infantry Division (ID), Philippine Army, kinunana a maipaayan ni Valera iti posthumous award ken insentibo para iti naibati a pamilya daytoy.
Kabayatanna, agtultuloy met ti panagpaimbag da Cpl. Harold Ganagan ti Tinglayan, Kalinga ken Cpl. Fajardo Manuel ti Paracelis, Mt. Province nga agpada a nadangran iti nasao nga engkwentro.
Maipalagip a malem ti Sabado, December 14 ket nakaawat ti militar iti impormasyon seknan iti panagkik-kikil dagiti rebelde sadiay Echague, Isabela ken iti panagresponde dagiti militar ket timmaud ti rinnupak a nagpaut iti 20 a minuto agingga a nagsanod dagiti rebelde.
Nangisayangkat ti tropa ti gobyerno iti hot pursuit operation a nagresulta iti panangkemmegda iti maysa a 17-anyos a child soldier ti rebelde a grupo.
Narekober manipod iti nasao a menor de edad ti maysa nga M16 armalite rifle a naglaon ti magazine ken bala, bagpack a naglaon ti pampabettak, detonating cord ken baterya.
Kinuna ti militar a saanen a limmaban ti barito idi apanda kinemmeg daytoy kalpasan a nakaawatda iti impormasyon manipud kadagiti umili gapu iti nakita nga imet daytoy nga atiddog a paltog.
Kinumpirmar a mismo ti barito iti militar a karaman daytoy kadagiti limmaban iti napasamak a rinnupak ken inaklonna a naklaatda idi nakarangetda dagiti soldado isut gapuna a nagsisina dagitoy kabayatan ti engkwentro.
Inaklon ti barito a pito a bulan na miembro daytoy ti NPA ken napagang-angawanda laeng iti pagayamna a menor de edad metlaeng a kumappeng iti rebelde a grupo.
Dinakamatna a ti paltog ken pampabettak a nakumpiskar kenkuana ket inted laeng ti dadaulo ti grupo dagitoy tapnu adda pangdepensana iti bagina.
