BAGUIO CITY – Im-imbestigaran paylaeng dagiti opisyal ti Barangay Atok Trail iti siudad ti Baguio ti pakabigbigan ti suspek ken motibo iti panakasabidong ti tallo nga aso sadiay Middle Atok Trail itay laeng nabiit.
Iti interview ti Bombo Radyo Baguio, kinuna ni Atok Trail Punong Barangay Federico Codley a nagturong ti Barangay Hall ti agtagikua kadagiti nasao nga aso tapnu ireklamo ti panakasabidong dagiti nasao a tarakenda iti uneg a mismo ti compound dagitoy.
Naamuanna a narekober iti sardinas a nalaokan ti cyanide ti pamilya nga agtaraken kadagiti nasao nga aso ken mapapati a daytoy ti impakan ti suspek kadagiti aso.
Impetteng kenkuana ti agtagikua kadagiti aso a saan a naatap dagiti nasao nga aso ken awan ti kinagkagat dagitoy.
Gapu iti daytoy, patien ti kapitan a posible a personal a gura ti rason iti panangsabidong ti suspek kadagiti nasao nga aso nangruna ta napasamak ti insidente iti uneg ti compound ti pamilya nga agtagikua kadagiti nasao nga aso.
Mainaig iti daytoy, inyunay-unay ni Kapitan Codley a daytoy ti umuna a gundaway nga adda ti panagsabidong iti aso a napasamak iti barangayda.
Gapu iti daytoy, ibalbalakadna kadagiti pet owners iti masakupan ti Barangay Atok Trail ti nainget a panangbantayda kadagiti tarakenda ken ti panangitalida kadagitoy.
