BAGUIO CITY – Agtaltalinaed a hotspot ti Kibungan, Benguet para kadagiti marijuana growers kasaruno ti panangdadael dagiti operatiba ti PNP ken PDEA iti nasurok P2.7-M a gatad dagiti pinuon ti marijuana iti uppat nga aldaw nga operasyon dagitoy kadagiti kabambantayan sadiay Tacadang, Kibungan, Benguet manipud March 21 agingga March 24.
Nadiskobre iti innem a pagmulaan ti 6,780 a pinuon ti dadakkel a marijuana, nasurok 1,000 a pinuon ti bunubon a marijuana ken 11 a kilos a marijuana bricks a dagus nga inuram dagitoy.
Nupay kasta, awan met ti natiliw a cultivator kabayatan ti nasao nga operasyon a paset ti serye ti anti-illegal drug operations dagiti otoridad kasaruno dagiti naawatda a report manipud kadagiti maseknan nga umili sadiay.
KABAYATANA,
Paayaban ti PDEA-Cordillera dagiti barangay officials ti Barangay Tacadang sadiay Kibungan, Benguet tapnu agpalawag dagitoy seknan iti nasaknap paylaeng a panagmula ti marijuana iti masakupanda a barangay.
Iti interview ti Bombo Radyo Baguio, kinuna ni PDEA-Cordillera Regional Director Gil Castro nga iti kaudian a marijuana eradication operation sadiay ita a lawas ket naduktalan ken nakita dagiti ebidensia a dagiti marijuana plantation sites ket matartaripato.
Kinunana a maab-abunuan ken masibsibogan dagiti dinadaelda a pinuon ti marijuana gaputa adda dagiti nakitada a pestisidio ken ti kaadayo dagiti puon ti marijuana iti tunggal maysa a maikaniwas iti ibagbaga dagiti advocates ti marijuana use nga agtubtubo laeng dagiti nasao nga iligal a mula.
Innayonna nga adda metlaeng dagiti nakitada a pasilidad ken disso a maar-aramat iti panakapagango dagiti iligal a mula.
Impettengna a nasken a maipalawag a naimbag dagiti barangay officials ti Tacadang no apay a nasken a saan a makasuan dagitoy iti kriminal ken administratibo gapu iti saan a malapdan nga illegal drug activities iti barangay dagitoy.
Innayonna a babaen iti daytoy ket maipaayanen iti nagan wenno mabigbigen dagiti agmulmula sadiay ti marijuana.
Inyunay-unay ni Director Castro a silulukat a kanayon ti linya ti komunikasyonna kadagiti barangay officials para iti tulongda iti kampanya kontra iti iligal a droga.
ni PDEA-Cordillera regional director Gil Castro
