BAGUIO CITY – Binigbig ni Sagada Mayor James Pooten Jr. ti posible a nakaalaana iti sakit kalpasan a naideklara daytoy a positibo iti COVID-19.
Atapenna a nakaptan daytoy kabayatan ti panagbisitana kadagiti pagtaengan ti umili sadiay a nagkedked a maipasidong iti swab test kalpasan a nabigbig dagitoy a direct contact ti pasyente a positibo iti nasao a sakit.
Inaklonna nga agtaltalinaed a karit iti lokal a gobyerno ti panangguyogoy kadagiti umili sadiay nga agpabakuna kontra iti COVID-19 gaputa saan dagitoy nga agpainterview.
Gapu iti daytoy, kinunana a mailaylayon paylaeng iti uppat nga aldaw ti pannakaipasidong ti barangay Balugan iti granular lockdown agingga a maileppas ti contact tracing sadiay.
Kabayatanna, imbinglayna a naka-work from home daytoy kabayatan ti pannakaipasidongna iti home isolation ngem impasiguradona met nga adda iti natalged a kasasaad ken awan ti marikriknana a sintomas ti COVID-19.
Kabayatana, makanselar dagiti naituding nga aktibidad para iti obserbasyon ti Semana Santa sadiay Sagada, Mountain Province kasaruno ti killaat manen a panagngato dagiti kaso ti COVID-19 sadiay.
Sigun kenkuana, nakimaymaysa dagiti dadaulo ti simbaan seknan iti pammilin a makanselar paylaeng ita a tawen dagiti kadawyan a misa a maipatpatungpal tunggal dumanon ti Semana Santa kas maitunos iti pammilin ti nasyonal a gobyerno.
Nupay kasta, kinunana a linagip latta dagiti umili sadiay ti palm sunday idi kalman nupay awan ti naisayangkat a misa gaputa nagturong laeng dagitoy iti simbaan tapnu alaenda dagiti palaspas a nabendisyonan.
Impettengna a napagnunumaanda kadagiti simbaan a marambakan latta ti semana santa ngem babaen laeng iti online service.
ni Sagada Mayor James Pooten Jr
