BAGUIO CITY -Panggep ti lokal a gobyerno ti siudad nga adaptaren ti konsepto dagiti ospital sadiay Metro Manila seknan iti panangimaneharda iti COVID-19 kasaruno ti agtultuloy a panagngato ti kaso ti COVID-19 ditoy lokalidad.
Sigun kenni Mayor Benjamin Magalong, inyuswatda idi napalabas a bulan ti telemedicine ken mapangpanggep met a maidevelop ti home care a mapunpuntirya nga agepekto iti siudad.
Kinunana a babaen iti panagkonsulta dagiti pasyente kadagiti doctors babaen online ket maobserbaran ti distansiya ken maliklikan ti face to face communication wenno ti physical contact a posible a mangitunda iti panagakar ti virus.
Inayonna a posible a mapunno dagiti ospital iti kanito a saan a malapdan ti panagngato ti kaso ti COVID-19 isu’t gapuna a mapunpuntirya ti panakaidevelop ti home care partikular dagiti pasyente nga addaan iti mild symptoms ti nasao a sakit.
Mainaig iti daytoy, impettengna nga ad-adalenda ti posible a panakaiturong dagiti pasyente a makapaspasar iti moderate ken mild cases iti 298 bed isolation ti local government unit tapnu makasayan ti pakaseknan dagiti ospital.
