BAGUIO CITY – Nagpalawag ti Department of Public Works and Highways (DPWH) – Baguio City District Enginering Office kadagiti pakaseknan ni Mayor Benjamin Magalong iti patrabahoda a sidewalk iti paset ti South Drive, ditoy siudad ti Baguio.
Sigun kenni Engr. Glenn Reyes, Assistant City District Engineer, adda ti koordinasyonda kadagiti maseknan a barangay officials ken makita iti isumsumitirda a binulan a physical status report ti proyekto nga adda ti koordinasyonda iti lokal a gobierno.
Inlawlawagna a naimbitar met dagiti maseknan nga opisyales kabayatan ti bidding, validation ken ti pre-bid conference ti nasao a proyekto.
Nupay inaklonna nga awan ti personal a koordinasyonda kenni Mayor Magalong, impasiguradona nga agtungpalda iti aniaman nga ikalikagum ti lokal a gobierno ti Baguio.
Inlawlawag met ni Engr. Tedler Depaynos Jr., project engineer ti nasao a proyekto a nangipatungpalda laeng iti clearing ken grabbing operations sadiay tapno ma-validate ti disenyo ti maisingsingasing a retaining wall sadiay a manamnama mangpalawa pay iti disso a mapagbalin a sidewalk.
Impettengna pay nga awan ti naputed a kaykayo iti nasao a proyekto.
Linawlawaganna metlaeng a “short of award” ti nasao a proyekto isut gapuna nga awan dagiti naimuntar a signages ken napagnumuan a maisayangkaten ti clearing ken grabbing operations gapu iti pakaseknan iti kasasaad ti panawen.
