BAGUIO CITY – Ituloy ti lokal a gobyerno ti Baguio City a waswasen ti kontratada iti Kaltimex Energy Philippines seknan iti rehabilitasyon ti city-owned Asin minihydro power plants.
Kasaruno daytoy ti maatap nga agtultuloy a panangbaybay-a ti nasao a kompanya iti obligasyonda a nailanad iti katulagan nga immunan nga inaprubaran ti korte.
Sigun kenni Mayor Benjamin Magalong, P160-M ti inisyal a gatad a napukaw ti siudad iti operasyon ti Asin Minihydro Power sipud 2012 idi nangipaulog ti Energy Regulatory Commission (ERC) iti cease-and-desist order a nangipasardeng iti operasyon ti power plants.
Inlawlawagna nga insingasingna iti local legistive body nga agsapulda laengen iti mapagtalkan ken financially capable a kompanya a mangimplementar iti rehabilitasyon ti century-old power plants a mangbukkel iti nadalus nga enerhiya ken mangnayon iti suplay ti enerhiya a sumrek iti Luzon.
