BAGUIO CITY- Impaulog ni Mayor Benjamin Magalong ti Executive Order No. 76, series of 2022 a mangimanmandato kadagiti amin a kontraktors a mangipaay pay nga umuna dagitoy ti pakdaar sakbay a rugianda ti road repair ken road widening tapno makapagsagana dagiti commuters wenno ti publiko.
Impetteng ti mayor a nasken nga iyumanda pay iti City Engineering Office ken iti Sangguniang Barangay, lima nga aldaw sakbay nga ipatungpalda ti aniaman a kita ti road projects
Innayon ni Mayor Magalong a sakbay a mangrugi ti operasyon ket masapul nga adda ti umno a signages wenno announcement a maipaskil iti disso a pakaipatungpalan ti proyekto tapno maimpormaran ti publiko.
Nasken metlaeng a suratan dagiti contractors dagiti agtagikua kadagiti balay, pasdek wenno istraktura a maapektaran, lima nga aldaw sakbay a mangrugi ti patrabaho.
Impaganetget ti mayor nga irresponsable dagiti saan nga agtulnog iti nasao a pammilin gaputa a makanayonan daytoy iti nailet a gunay ti trapiko.
Kabayatanna, binilin met ni Mayor Magalong ti City Engineering Office a mangisumiterda ti linnawas nga inventory dagiti baro ken dagiti manarimaan a road project iti Public information Office tapno maiwaragawag daytoy iti publiko.
