BAGUIO CITY – Naituding a marambakan ti maika-113 a Baguio Charter Day inton bigat, Setyembre 1, babaen kadagiti naisagana nga aktibidad.
Ti nasao a selebrasyon ket addaan ti tema a Getting Ready for the Future.”
Immunan a dinakamat ni City Administrator Engr. Bonifacio Dela Peña a mangrugi ti seremonya iti alas otso ti agsapa agingga alas dose ti pangngaldaw iti Baguio Convention Center.
Manamnama a dumar-ay dagiti opisyales, umili ken sumagmamano a sanga-ili.
Sigun iti opisyal, nangrugin dagiti daduma nga aktibidad idi pay Agosto 20 ken agleppas daytoy agingga inton Oktobre 7.
Karaman ditoy ti kaleppas a Miss Baguio Coronation night idi Agosto 27 ken sumagmamano metlaeng nga aktibidad ti naipatungpal sadiay Igorot park, Botanical Garden ken Country Club.
Impetteng ni Dela Peña nga awan ti parada a maipatungpal ita a tawen gaputa agtaltalinaed ti Baguio City iti Alert Level 1.
Tarigagay ita ti Baguio City nga agbalin kas maysa kadagiti “smart city” iti pagilian.
