BAGUIO CITY – Kidkiddawen ni Councilor ken ABC President Michael Lawana ti panakaituloy ti merging wenno panagtitipon dagiti babbarangay iti Baguio City.
Iti interview ti Bombo Radyo, kinunana nga idi pay 2016 a nabukel ti technical working group ken adda metten ti inaramidda a clustering dagiti 128 a barangay iti siyudad.
Dinakamatna nga addan ti uppat a pulo ket dua a barangay a pinagtitipon dagitoy kas maibasar iti topographic location, crimes, peace and order situation, land area ken population.
Nupay kasta, impettengna nga awan paylaeng ti aksyon ti kongresista ken city council idi kiniddawda ti tulong dagitoy.
Nailanad iti local government code, masapul nga adda ti 5,000 a minimum a populasyon tapno mabukel ti maysa a barangay.
Inlawlawag ni Lawana nga 80% kadagiti barangay iti Baguio City ket saan a pimmasa iti nasao nga standard rason a nasken a pagkakadwaenda dagiti dadduma a barangay.
Babaen iti daytoy ket bassit laeng ti pagdumaan ti era wenno bilang dagiti populasyon ken ti pundo iti tunggal barangay.
