BAGUIO CITY – Maisublin ti face-to-face a panagbisita iti Baguio City Jail mangrugi ita nga aldaw, Disyembre sais, kalpasan a naiparit daytoy iti uneg ti dua a tawen gapu iti COVID-19.
Iti interview ti Bombo Radyo, kinuna ni Jail Superintendent Mary Ann Tresmanio, mapalubosan dagiti immediate family dagiti persons deprived of liberty (PDLs) wenno balud nga agbisita.
Dinakamatna nga adda dagiti maisimpa a lamesaan ken tugawan iti quadrangle nga isu ti maaramat kas visiting area.
Iti datus, pakabuklan a 415 ti bilang dagiti lallaki a balud bayat a pito ket innem met dagiti babbai a balud iti Baguio City Jail.
Impetteng ni Tresmanio a tunggal balud ket limitado laeng iti dua a bisita ken maipaayanda laeng ti maysa nga oras tapno maakomodar amin dagiti bisita.
Sakbay a makastrek iti Baguio City Jail ket kasapulan a mangiparang ti vaccination card ken agparehistro.
Saan a mapalubosan nga agbisita dagiti ubbing nga agtawen iti pito nga agpababa ken dagiti masikog.//RK Bantiding
