BAGUIO CITY – Maur-uray laengen ti pirma ni Baguio City Mayor Benjamin Magalong tapno maipangato ti entrance fee iti Botanical Garden.
Daytoy ket kalpasan a naaprubaran iti maikatlo ken pinal a panakaibasana iti konseho ti singasing nga ordinansa a mangkidkiddaw iti panakaipangato ti entrance fee dagiti turista ken bisita.
Iti sidong ti singasing nga ordinansa, P100 ti agbalin nga entrance dagiti turista nga agtawen ti sangapulo ket tallo nga agpangato; P25 kadagiti turista nga agtawen ti sangapulo ket dua nga agpababa ken 20% kadagiti turista a senior citizen ken PWDs.
Para met kadagiti residente ti Baguio City, P50 kadagiti adult; P25 kadagiti ubbing ken estudyante nga agtawen ti sangapulo ket tallo nga agpangato, libre kadagiti agtawen iti sangapulo ket dua nga agpababa kasta metten kadagiti senior citizens ken PDWs.
Iti agdama, ti entrance fee dagiti adults ket P10 bayat a dagiti ubbing ket P5 kas maibasar iti Section 31-C ti Environment Code of Baguio City (Ordinance 18-2016).
Immunan a nailawlawag a ti panakaipangato ti entrance fee ket maaramat iti ad-adda pay a panakapapintas ti nasao a parke.
