PUGO, LA UNION- Pimmusay ti konduktor ken dua pay a pasahero ti victory liner iti aksidente sadiay Pugo, La Union idi kalman.
Nabigbig ti konduktor a ni Josefino Rombaoa Jr y Lumagpas., 28-anyos, naasawaan ken residente iti Nibaliw East, San Fabian, Pangasinan.
Nabigbig met dagiti pimmusay a pasahero a da Mervilyn Lagmay , 26-anyos, ken residente iti West Tapinac, Olongapo City, Zambales kenni Hydelene Hufalar , 23-anyos ken residente iti Biday, San Fernando, La Union.
Naitaray dagitoy iti La Union Medical Center, ngem indeklara a dead on arrival dagiti attending physicians.
Kabayatanna, agpapaimbag dagiti lima pay a nagpasar ti injuries da Acheng Kilaban , 29-anyos, residente iti Kapangan Benguet, Perlito Rillorta, 54-anyos, safety officer ken residente iti Teachers Camp Baguio City, Ryean Guilalas, 17-anyos, ken Juliet Gutierrez, 64-anyos ken agpada a residente iti Beckel La Trinidad Benguet kenni Lyn Miggol, 24-anyos ken residente iti Kias, Baguio City.
Sigun iti driver a ni David Guiriba, 54-anyos, tubo ti Quezon City, binumtak ti right rear tire ti bus rason a naawanan ti control iti steering wheel a nangitunda iti panakaidungparna iti acacia tree, 10:40 AM idi kalman.
Daldalyasaten ti bus ti Palispis-Aspiras highway, particularly Ambiongan, Cares idi napasamak ti aksidente. Nagtaud ti bus nga addaan body number a 232 manipud Baguio, 9:30 AM ken paturong kuma sadiay Cubao idi napasamak ti aksidente.
Ti nasao a driver ti bus ket addan iti kustodiya ti pulisya para iti umno a dokumentasyon ken ti agtultuloy nga imbestigasyon.
