LA TRINIDAD, BENGUET – Manarimaan ti imbestigasyon ti Regional Highway Patrol Unit – Cordillera iti narekober a lugan idiay Puguis, La Trinidad, Benguet itay nabiit.
Iti interview ni Bombo Genzel Depayso kenni PCapt. Dindo Salming, Chief Public Information Officer ti Regional Highway Patrol Unit Cordillera, na- carnap wenno natakaw ti 2022 Toyota Innova idiay Bulacan iti umuna a lawas ti Enero ita a tawen.
Kukua daytoy ti maysa a police officer nu sadino natakaw bayat a nakaparada idiay Francisco Homes, San Jose Del Monte, Bulacan.
Narekober met ti nasao a lugan idi Enero 23, pasado alas nuebe ti rabii.
Sigun kenni PCapt. Salming, ti end user wenno ti indibidual a naka-iggem iti 2022 Toyota Innova ket residente ti Puguis, La Trinidad, Benguet.
Dinakamat ti nasao nga opisyal a bayat ti panagpatrolya dagiti kameng ti Highway Patrol Group – Cordillera ket nakitada ti nasao a lugan a nakaparada idiay Puguis, La Trinidad.
Gapu iti daytoy, dagusda nga impakaammo iti end-user wenno iti mangus-usar iti nasao a lugan a daytoy ti sapsapulanda a nakarnap a lugan.
Iti panagimbestigarda, naammoanda iti end-user a ginatangna laeng ti nasao a lugan iti maysa nga indibidual nga isu ti sapsapulen ita dagiti otoridad.
Boluntaryo met nga insuko ti maseknan nga umili ti nasao a lugan kadagiti otoridad ken saan a maibalud daytoy.
Inlawlawag met ni PCapt. Salming a ti napasamak nga insidente ket maibilang kas technical carnapping gapu ta ti end user ket saan a mismo nga isu ti suspek iti panagtakaw nu di ket adda ti middleman a karaman iti nasao a kaso.
