Kinumpirmar ti Korte Suprema nga impila ni Atty. Michael Poa ti “entry of appearance” na kas co-counsel ni Vice President Sara Duterte.
Daytoy ket gapu iti petision nga impila ni Duterte iti Korte Suprema mangkarit iti validity ken constitutionality ti maikapat nga impeachment complaint kontra kenkuana.
Iti petision, inrason ni Duterte a ti maikapat nga impeachment complaint kontra kenkuana ket sinalungasing ti 1987 Constitution’s one-year ban iti panangipila iti impeachment complaints sipud idi nagtignay ti Kamara iti tallo nga inisial a reklamo babaen ti saanda a panangitulod iti opisina ti House Speaker.
Tallo nga impeachment complaints ti naipila kontra kenni Duterte idi Disiembre 2024 nga amin ket maipapan iti mapapati a saan a nasayaat a panagaramat ti confidential funds.
Ti maikapat nga impeachment complaint ket inyendorso ti nasurok dua gasut a mammanday-linteg idi Pebrero a singko.
Ni Poa ket nagserbi kas pannakangiwat ti Bise Presidente.
Kinunana a ti kontratana ket nagleppas idi Nobiembre 2024.
Nagserbi pay ni Poa kas undersecretary ken spokesperson ti Department of Education idi dadaulo paylaeng ni Vice President Duterte iti nasao nga ahensia.
