Kidkiddawen ni Senate President Francis “Chiz” Escudero ti panagadal manen ti Philippine Inland Gaming Operators (PIGOs), kagiddan ti panangiyebkasna ti epekto kadagiti Pilipino kalpasan ti pannakaiparit dagiti Philippine Offshore Gaming Operators (POGOs).
Sigun kenni Senador Escudero, iti baet a naipawil ti POGO iti Pilipinas, adda met ti PIGO nu sadinno, dagiti agsugsugal ket dagiti Pilipino.
Kinunana pay a bayat a naiserra dagiti POGO, mabalin a nag-rebrand ti dadduma a kas PIGO tapno agtultuloy ti operasionda.
Gapu iti dayta, idagdagadag ni Senador Escudero iti Philippine Amusement and Gaming Corporation (PAGCOR) a mangisayangkat ti naun-uneg ken “transparent” a panagadal kadagiti PIGO tapno matingiting ti pudno a gastos ken benepisioda.
Para kenni Escudero, nu maipakita ti ebidensia a dangdangran dagiti PIGO dagiti Pilipino, partikular dagiti nababa ti matgedanda, patien ni Escudero a rumbeng nga ikonsidera ti gobierno ti pannakaiparit a kapada dagiti POGO.
Maipalagip nga imbilin ni sigud a President Rodrigo Duterte ti pannakaiserra ti e-sabong (online cockfighting) kalpasan a sumagmamano nga indibidual a karaman iti nasao nga industria ket mapukpukaw.
Iti agdama, addan ti dua a gakat ti naipila iti Senado para iti pannakaipawil ti online gambling.
