Impakaamo ti Malacañang a nakasagana no mangipaulog ti ICC iti warrant of arrest kontra iti sigud a Presidente, ngem inlawlawag ni Palace Press Officer Undersecretary Atty. Claire Castro nga awan pay ti kumpirmasion iti pannakaipaulog ti arrest warrant.
Iti maysa nga statement, kinuna met ni Solicitor General Menardo Guevarra nga awan ti naawatda nga aniaman a pakaamo wenno “communication” manipod iti ICC seknan iti nasao a banag.
Kinuna ni Guevarra a ti Department of Foreign Affairs ti official entry point iti aniaman a pakaamo wenno “communication” kas diplomatic courtesy.
Idi Enero iti agdama a tawen, inyebkas ti Department of Justice (DOJ) a nakalukatda a makilangen iti ICC mainaig iti imbestigasionda iti drug war ni sigud a President Duterte.
Nupay kasta, saan a nagbaliw ti takder ti Pilipinas no maipapan iti ICC ken ti panagikkat ti pagilian.
Maipalagip nga idi Oktubre idi napalabas a tawen, kinuna ni sigud a President Duterte iti congressional hearing nga alaenna ti “full, legal responsibility” iti war on drugs ken impaganetgetna a saan nga agdispensar para iti nasao a kampaniana.
