Maal-allukoy ti publiko a makipaset iti panakaipatungpal ti World Tuberculosis Day iti pagilian inton bigat.
Iti panakiuman ti Bombo Rayo kenni Dr. Donnabel Panes, Medical Officer IV ti City Health Services Office, kinunana a ti panakarambak ti World Tuberculosis Day ken inton Marso baente kwatro iti agdama a tawen nupay kasta, umuna a rambakan daytoy ti pagilian a Pilipinas.
Sigun kenni Dr. Panes, daytoy ket maangay sadiay Baguio Athletic Bowl a mangrugi iti oras ti alas syete ti agsapa.
Kinunana a dagiti serbisyo a maipatungpal iti daytoy ket screening tapno dagus a maamoan no adda ti sakit ti maysa nga indibidual iti Tuberculosis, kasta met ti libre nga X-ray, dagiti PhilHealth services, family planning, nutrition counseling, ken daduma pay.
Dagiti priority iti nasao nga aktibidad ket dagiti senior citizens kasta met dagiti informal groups a pakairamanan dagiti vendors, taxi drivers construction worker, security guards ken daduma pay.
Innayon ni Dr. Panes a daytoy a World Tuberculosis Day ket addaan panggep a mangitandudo iti “healthy lifesytle” ken tapno maliklikan ti nasao a sakit.
Maibasar met iti datos, ti Pilipinas ti maikalima a pagilian iti sangalubongan nga addaan iti kaadoan a sakit ti tuberculosis.
