Panggep ti kampo ni sigud a President Rodrigo Duterte nga iduron ti pannakaikkat ti kaso a crimes against humanity sakbay ti sumaruno a pannakadengngeg ti International Criminal Court inton Setiembre 23.
Sigun kenni sigud a presidential spokesperson Harry Roque, panggepda nga idatag ti epekto ti mapapati a panangkidnap kenni Duterte, kasta met dagiti pakaseknan iti hurisdiksion nga agtaud iti panagikkat ti Pilipinas iti ICC.
Kinuna ni Roque nga ur-urayenda pay laeng ti pirma ni Duterte kadagiti dokumento a kasapulan tapno opisial a mairaman isuna kas legal counsel iti kaso a nagtaud iti makapapatay a war on drugs ti administrasionna.
Idi nadamag met ti pannakangiwat ti International Criminal Court a ni Fadi El Abdallah tapno maberipikar nu opisial a paset da Roque ken British lawyer Atty. Nicholas Kaufman iti legal counsel ni Duterte, kinuna ni El Abdallah a maipablaak ti impormasion iti umno a tiempo.
Idi laeng Biernes, nagparang iti umuna a gundaway ni Duterte babaen iti video link manipod iti ICC Detention Center.
Bayat ti panagdinggeg, pinasingkedan ti Pre-Trial Chamber I ti kinasiasinona ken siniguradona a naan-anay a naipakaammo iti pagsasao a maawatanna maipapan kadagiti krimen a mapabasol nga inaramidna ken dagiti karbenganna iti sidong ti Rome Statute ti ICC.
