BAGUIO CITY- Inarestar dagiti otoridad ti agtawen iti 38 nga errand delivery boy a residente iti Purok 15, Irisan, Baguio City gapu iti panaglabsingna iti Comprehensive Dangerous Drugs Act of 2002.
Nakumpiskar manipod iti suspect ti nasurok a P390,000.00 a gatad iti maatap a shabu.
Buklen daytoy ti maysa a piraso iti heat-sealed transparent plastic sachet a naglaon iti maatap a shabu nga agdagsen iti MOL 2.5 grams ken agbalor iti P17,000.00, ken ti kanayonan a 17 a piraso iti kapada a kontrabando nga addaan met iti Standard Drug Price a P374,000.00.
Karaman met a nakumpiskar manipod iti suspect dagiti non-drug evidence kas iti maysa a piraso iti genuine five-hundred-peso bill, onse a piraso iti five-hundred-peso fake bills, kwarta a dumanon iti P76,850.00, Black Yamaha NMAX motorcycle, maysa nga helmet, ken dadduma pay.
Iti agdama, addan iti kustodiya ti PNP DEG SOU CAR ti suspect bayat a maisagana dagiti kaskenan a dokumento para iti panakaipila iti kaso kontra iti daytoy.
Kabayatanna, maipaima met iti Regional Forensic Unit-Cordillera dagiti nakumpiskar nga ebidensya.
Naballigi ti buy-bust operation nga insayangkat dagiti kameng iti Philippine National Police Drug Enforcement Group- Special Operation Unit-Cordillera (lead unit), BCPO-PS9, RID PRO CAR, ken PDEA CAR idiay Purok 12 Irisan, Baguio City rabii idi kalman.//Bombo Genzel Depayso
