Impabuya ti Chinese state television ti footage ti tallo a Pilipino a natiliw gaputa mapapati a mangmangged dagitoy iti Philippine intelligence agency tapno makaurnong iti classified information maipapan iti militar daytoy.
Impakita ti state broadcaster CCTV dagiti video dagiti mapapati nga espia nga adda iti sidong ti kustodia ti pulisia.
Nakita iti footage ti tallo nga indibidual a makisarsarita ken salsaludsuden dagiti kameng ti pulisia.
Kinuna ti state media sadiay nga impudno dagiti tallo dagiti alegasion.
Inyebkas ti Pilipinas ti pannakaalarma gapu iti pannakakemmeg, ken kinunana nga ordinario nga umili dagiti tallo a Pilipino ken mabalin a panagibales ti pannakaibaludda iti panangraut ti Pilipinas kadagiti mapapati nga espia ti China.
Sigun iti National Security Council ti Pilipinas, dagiti tallo ket sigud nga immawat iti government scholarship program a nabukel iti sidong ti katulagan iti nagbaetan ti probinsia ti Hainan iti abagatan ti China ken ti probinsia ti Palawan iti laud ti Pilipinas.
Kinuna ni NSC spokesperson Jonathan Malaya a saan a pudno nga adda ti dadduma nga ahensia ti gobierno a kas ti ‘Philippine Intelligence Agency’ or ‘Philippine Spy Intelligence Services’ a nadakamat dagiti Pilipino iti maysa a video.
