Nakemmeg ti maysa manen nga illegal drug pusher iti insayangakat dagiti otoridad a buy bust operation a itay kanikadua sadiay Benitez Compound, Lower Magsaysay, Baguio City.
Nabigbig ti suspek nga agtawen iti trentay singko a lalakI, naasawaan ken maysa a construction worker.
Iti pannakiuman ti Bombo Radyo iti suspek, kinunana a naiyanak daytoy sadiay Tarlac City ket nabayagen a residente ti Pico, KM 4 La Trinidad Benguet idi paylaeng tawen 2013.
Kinunana a ti droga a nakumpiskar manipud kenkuana ket impatalud laeng iti am-ammuna.
Nupay kasta, ti suspek ket adaan iti rekord sadiay Tarlac City kalpasan a natilliw daytoy sadiay idi tawen 2019 iti kapada metlaeng a rason.
Iti naisayangkat a buy bust operation, nakompiksar manipod kenkuana ti mapattapatta a 1 grams ti sold a maatap a shabu ken 1 grams nga adda iti ikotna.
Dagiti nakompiskar nga iligal a droga ket addan iti pakabuklan a gatad a dumanon iti 13,600.
Iti sabali a bangir, kinuna ni Captain Jose Amagen ti Lower Magsaysay a daytoy ti maikadua a gundaway a nakatiliwda ti illegal drug pusher iti masukapanda ita a tawen.
Nupay kasta, dinakamatna a saan a residente daytoy iti nasao a barangay.//Bombo Genzel Depayso
