Full force ti Baguio City Police Office ita a Holy week kagiddan ti manamnama nga ado nga isasangbay dagiti turista.
Iti panakiuman ti Bombo Radyo kenni Police Colonel Ruel Tagel, City Director ti Baguio City Police Office, kinunana a nakaalerto dagiti sangapulo a police stations iti siudad kasta met dagiti tallo nga operating units.
Sigun kenni Tagel, ti deployment dagiti pulis ket saan laeng a para kadagiti nagduduma a tourist destination iti siudad no diket karaman dagiti bus terminals, dagiti palengke, kadagiti kalkalsada ken daduma pay a lugar.
Malaksid iti dayta, makita met laeng dagiti police assistance desk kadagiti strategic place a mabalin a pagdamagan ti publiko no adda ti kayatda a maamoan.
Kinuna ni Tagel a kagiddan ti panagado dagiti turista ket ti panagado met dagiti kawatan rason nga adda iti “anti-theft teams” nga agpatpatrolya iti siudad.
Iti agdama, sipapanakel a kinuna ti City Director a bimmaba ti kaso ti panagtakaw iti siudad gapu iti agtultuloy a panagregget dagiti otoridad.
