Impannakkel ni Lany Ganayan, agtagikua iti Northern Blossom Flower Farm, ti panagdur-as ti tursimo iti munsipyo iti Atok kalpasan ti panakabigbig ti talon daytoy kas maysa kadagiti nalalatak a pagpasyaran iti nasao a munsipyo.
Iti panakiuman ti Bombo Radyo kenni Ganayan, imbinglayna a nabaliwan ti panagkitada dagiti tattao iti komunidad gapu iti turismo.
Sigun kenkuana, adun dagiti nagtaud a baro a pagpasyaran gapu iti turismo rason a pagyamyamananda ti kontribusyinna iti ekonomiya iti nasao a munsipyo.
Kagiddan dayta, imbinglayna pay nga ad-adu itan dagiti naibangon wenno naaramid a transient houses nu sadino, manipod iti sangapulo ket maysa laeng idi 2023, dumanon itan iti tallo pulo ti bilang dagitoy.
Sigun kenni Ganayan, daduma kadagiti transient houses ket narepair laeng a residential houses wenno pagtaengan.
In-inot met a naibangon dagiti daduma pay a pagpasyaran kas iti Hidden Garden ken Mt. Olis malaksid pay kadagiti nalalatak a tourist destinations sadiay kas iti 2nd Highest Point, Sakura Park, Grotto, ken ti Northern Blossom.
