Nagpakdaar ti Philippine Consulate General sadiay Vancouver, Canada ti publiko kontra kadagiti agpampammarang a mangur-urnong ti pondo para kadagiti biktima ti nakaam-amak a panangatake kadagiti timmabuno iti Lapu-Lapu Day festival idi Abril 27, 2025.
Impaay ti konsulado ti nasao a palagip kalpasan a nakadanon kadakuada ti damag nga adda dagiti tao a nangbukel ti GoFundMe pages para iti mapapati a panagurnong ti pondo kadagiti biktima.
Binalakadan ti konsulado ti publiko nga agannad tapno saan nga agbalin a biktima dagiti mananggundaway iti trahedia a napasamak iti Filipino Community iti British Columbia.
Kabayatanna, kinuna ni Palace Press Officer Undersecretary Atty. Claire Castro, a kayat a maipasigurado ni President Ferdinand ”Bongbong” Marcos Jr., a maipaay ti kasapulan a tulong kadagiti Pilipino a biktima iti napasamak a panangdalapos ti maysa a suspek bayat ti piesta.
Ngimmato iti sangapulo ket maysa nga indibidual ti pimmusay iti panagatake.
Napilaan metten ti reklamo ti nakemmeg a suspek a ni Kai-Ji Adam Lo nga agtawen ti tallo pulo.
Impasigurado met ti Department of Migrant Workers a nakasaganan a mangipaay ti tulong kadagiti bitkima ti nasao a kinaranggas.
