Impakaamo ti China a makikoordinardan kadagiti otoridad ti Pilipinas tapno makaala ti impormasion maipapan iti Chinese a lalaki a natiliw gapu iti mapapati nga alikamen ti panagespia iti asideg dagiti opisina ti gobierno iti Metro Manila, ken binalakadanna dagiti politiko ti Pilipinas a saanda nga aramaten ti nasao a banag a mapalawa ti isyu a mainaig iti China.
Idi laeng Martes, tiniliw dagiti otoridad ti maysa a Chinese nga addaan ti mapapati nga “spying” equipment iti asideg ti pasdek ti Commission on Elections (Comelec) sadiay Intramuros, Manila, kalpasan ti adu nga aldaw a panangmonitorda kenkuana ken ti katrabahuanna nga agrikrikus iti asideg dagiti dadduma nga opisina ti gobierno.
Sigun iti Foreign Ministry ti China, saanda nga interesado iti pannakibiang ti internal affairs ti Pilipinas.
Immunan a kinuna ti Commission on Elections nga awan ti namonitor a pannakariribuk kadagiti sistemana kalpasan ti pannakatiliw, bayat a kinuna ni Palace Press Officer Undersecretary Claire Castro a “medio makapadanag” ti kasasaad.
