Maipatungpal ti maikatlo a Farmers ken Fisherfolks Month iti munisipyo ti La Trinidad ita a bulan ti Mayo nu sadino maisayangkat ti sangapulo nga aktibidad.
Iti panakiuman ti Bombo Radyo kenni Nida Organo, Municipal agriculturist iti munisipyo ti La Trinidad, kinunana a ti bulan ti Mayo ket naideklara kas Farmer’s Month.
Gapu iti dayta, mangipatungpal ti Agriculture Office ti La Trinidad, Benguet kadagiti nagduduma nga aktibidad para kadagiti mannalon kas pannakabigbig kadakuada kas backbone iti pagilian a Pilipinas.
Sigun kenni Organo, dagiti mannalon ti “mangpakpakan” kadagiti kaaduan a Pilipino gapu kadagiti mulada nga agriculture products rason a kasapulan a maipaayanda iti limelight ken mabigbig iti potensyalda.
Inwaragwagna a ti umuna nga aktibidad dagitoy ket ti Farmer Official For a Day inton May 19; Product Promotion Fair: La Trinidad Dako-an inton May 19 angingga 29; Opening program inton May 20; Strawberry Technology Updates ken Growers Forum inton May 21; Urban Gardeners Day ken Cutflowers Day inton May 22; Organic Practitioners Assembly inton May 23; Cacao ken Coffee Day inton May 26; Singing Contest ken Search for Mr. and Ms. Farmer 2025; Livestock, Fishery, ken Beekepers day inton May 28; ken Awards ken Culminating Activity inton May 29.
