Nakailista ti probinsia ti Benguet iti zero crime incidents iti naisayangkat a national ken local elections itay kanikauda.
Iti panakiuman ti Bombo Radyo kenni PCOL Joseph Bayongasan, Provincial Director ti Benguet Police Provincial Office, kinunana a generally peaceful ti sangapulo ket maysa a munisipyo iti nasao a probinsya.
Nupay kasta, maysa a parikut a napasaran dagitoy bayat ti election period ket ti panangiyakar wenno panangibiahe kadagiti Automated Counting Machines (ACM) kadagiti sumagmamano a munisipyo a saan nga asideg iti kalsada kas kadagiti munisipyo iti Bakun, Kibungan, ken kadagiti sumagmamano a paset ti munisipyo ti Bokod.
Malaksid iti dayta, saan a nagbalin a parikut para kadakuada ti pannaka-augment dagiti sumagmamano a personnelda idiay probinsya ti Abra agsipudta naipasigurado met a nabantayan amin dagiti polling precincts iti nasao a probinsya.
Kabayatanna, kinuna ti nasao nga opisial nga iti baet a naobserbaranna ti panag-aapa dagiti sumagmammano a supporters dagiti agsinnumbangir a partido iti social media, agyamyaman met daytoy nga awan dagiti insidente a napaspasmak iti nasao a probinsya gapu iti panag-aapa dagiti supporters seknan paylaeng kadagiti agsabali a partido a supsuportaren dagitoy.
Iti agtultuloy a kappia iti probinsya ti Benguet tunggal eleksion, kidkiddawenna met ti suporta ken kooperasyon ti umili iti probinsya ti Benguet tapno agtalinaed ti kappa iti nasao a probinsya.
