Imbinglay ni Dr. Ricky Ducas, Program Manager ti City Health Services Office Mental Health and Wellness Unit kabayatan ti panakiuman ti Bombo Radyo kenkuana a dagiti factors a mang-apapektar iti mental health ti maysa a tao ket ti dysfunctional family, physical, sexual ken verbal abuse, ti environment ken daduma pay.
Inlawlawagna a saan a kanayun a ti factor dagiti mental illness ket gapu ta namana wenno genetics gapu ta saan daytoy a primary cause.
Saan a mailibak nga iti inaldaw ket adda iti stressor wenno ti mangituntunda iti panakastress iti maysa a tao, rason a nasken a maamoan dagiti nagduduma a wagas tapno mapasayaat iti panagtaray ti panunot.
Sigun kenni Dr. Ducas, ti umuna ket nasken nga agpakonsulta ti maysa nga indibidual kadagiti propesyonal a doktor no makarikna daytoy iti simtomas maipapan ti mental illness.
Maikadua, ti panag-ehersisyo gapu ta nasayaat daytoy kas coping mechanism no na-stress ti maysa nga indibidual.
Maikatlo, ti panagturong, ti panangala iti umdas a turog para iti panaginana ti bagi ken kamaudiananna ket ti panangkita kadagiti taraon a maipaun-uneg, rumbeng a dagitoy ket nasustansya.
