Alignment dagiti balota a mafeed iti automated counting machine ti nagbalin a kangrunaan a pakaseknan a napasaran ti Tabuk City, Kalinga iti kaleppas a National ken local elections.
Malaksid iti dayta ket ti nakapsot a signal iti laksid a nangaramat dagitoy iti starlink.
Iti panakiuman ti Bombo Radyo kenni Atty. Gustavo Dalen, ti election officer sadiay Tabuk City, Kalinga, kinunana a dumanon iti oras ti alas 11:00 ti agsapa idi Mayo a 13, 2025 ti naudi a nakapagtransmittanda kadagiti resulta ti eleksyon rason a saanda met a dagus a nakaiproklama dagiti nangabak.
Nupay kasta, iti laksid dagiti pakaseknan a napasaranda ket balligi a naisayangkat ti midterm elections.
Sigun kenni Atty. Dalen, amin dagiti nagtaray iti midterm elections sadiay Tabuk City ket nangabak malaksid iti maysa nga indibidual a naabak iti kina-vice Mayor.
Kinuna ti election officer nga iti position a mayor ket unopposed gapu ta awan ti kalabanna bayat nga iti kina-councilor ket sangapulo kadagitoy ket naiproklama gapu iti panakanselar ti Certificate of candidacy ti maysa nga agngayngayangay.
Para iti nasao a lugar, dumanon iti agarup 86% ti voter’s turnout a mangipaspasimudaag a dagiti botante ket aktibo a nakipaset para iti panakapili ti baro a lider dagitoy.
