Bangkay a nasarakan ti maysa a lalaki nga agtawen iti 40 idiay No.137 Purok 2 View Deck Mansion House, Dontogan, Baguio City idi laeng kalman.
Ti nasao a lalaki ket maysa nga on-call driver,naasawaan,tubo iti La Paz,Umingan,Pangasinan ngem agdama a residente iti Dontogan, Baguio City.
Iti naala nga impormasyon iti Bombo Radyo manipod iti kapulisan, napasamak ti insidente pasado alas cinco iti malem idi May 19.
Sigun iti kapulisan, insalaysay kadakuada ti witness a nakitana ti nakauy-oy wenno nakabitin a bagi ti nasao a lalaki apaman a simrek iti nakalukat a silid daytoy.
Sigun iti witness a maysa metlaeng nga on-call driver, telecom wire ti naaramat iti maatap a panagbekkel ti lalaki.
Kasaruno dayta, dagus nga impakaammo ti witness ti insidente kadagiti kameng iti pulisya.
Innayon ti witness a rabii sakbay ti insidente ket nangipatulod ti lalaki iti ladawan iti hanging wire nu sadino, pinakuyuganna daytoy iti mensahe nga arigna nakasaganan ken agkidkiddaw iti pammakawan.
Malaksid iti dayta, imbinglay met ti maysa pay nga indibidwal a nangngeganna ti nasao a lalaki a mangisawsawang kadagiti sarita a “Madanunanda daytoy a mangil-ngilaw iti oras iti alas siete ti agsapa.”
Nupay kasta, saan pay a naduktaklan ti eksakto a rason iti maatap a panangkettel ti lalaki a saanen nainaganan iti bukodna a biag.
Kabayatanna, iproseso met dagiti kameng iti Baguio City Forensic Unit ti crime scene ken iti agdama, manarimaan paylaeng ti imbestigasyon dagiti otoridad iti nasao nga insidente.//Bombo Noveh Organo
