Kidkiddawen ti Highway Patrol Group (HPG) Benguet kadagiti umili iti nasao a probinsya a saan dagitoy nga agbuteng kadagitoy no mangipatpatungpalda iti checkpoints agsipud ta daytoy ket paset ti mandatoda.
Iti panakiuman ti Bombo Radyo kenni PCPT. Jonathan Dumling, dadaulo ti Highway Patrol Group Benguet, inyunay-unayna a nakasagana dagitoy a tumulong kadagiti biyaheros nangruna no addaan dagitoy iti parikut seknan kadagiti luganda.
Daytoy ket kagiddan ti panangipablaak dagiti sumagmamano nga umili iti social media a liklikanda ti dumalyasat iti maysa a lugar gapu iti presensya dagiti Highway Patrol Group.
Nopay kasta, panggep ni PCPT. Dumling nga ipakaawat kadagiti motorista a dagiti Highway Patrol Group ket saanda a mangipatpatungpal iti operasyon tapno mangipaay iti parikut iti publiko no di ket para iti panangipaayda iti tulong.
Innayon pay ti dadaulo ti Highway Patrol Group Benguet a nasaysayaat no asitgan dagiti umili dagitoy tapno iti kasta ket maipakaawat kadakuada dagiti nagduduma a pagannurutan iti pagilian a Pilipinas partikular ti Republic Act 4136 wenno ti Land Transportation and Traffic Code.
